Urdu Poetry: Jaanaan,Jaanaan

Ab kay tajdeed-e-wafa ka nahin imkaa'n Jaanaa'n
Yaad kya tujh ko dilayein tera paemaa'n Jaanaa'n

Yun hi  mousam ki  ada dekh kay yaad  aya hai
Kis qadar jald badal jate hain insaa'n Jaanaa'n

Zindagi    teri   ata   thi   so  tere  naam   ki   hai
Hum ne jaise bhi basar ki tera ehsaa'n Jaanaa'n

Dil  yeh  kehta hai kay  shayad  ho  fasurda tu bhi
Dil ki kya baat karein dil to hai naadaa'n Jaanaa'n

Awwal awwal ki  mohabbat kay nashay yaad to kar
Be  piay   bhi  tera   chehra  tha  gulista'n  Jaanaa'n

Aakhir aakhir to yeh alam  hai kay kuch hosh nahin
Rag-e-meena  sulag  uthi  kay rag-e-jaa'n Jaanaa'n

Muddato'n se yehi  alam na tawaqqa na ummeed
Dil  pukare hi chala  jata hai  Jaanaa'n,   Jaanaa'n

Hum bhi kya saada thay  humne bhi samajh  rakha tha
Gham-e-dora'n se juda hai gham-e-Jaanaa'n, Jaanaa'n

Har koi apni hi  aawaz  se  kaanp  uth'ta  hai
Har koi apne hi saaey se haraasa'n Jaanaa'n

Jis   ko   dekho   wahi   zanjeer   ba'pa  lagta  hai
Shaher ka shaher hua dakhil-e-zindaa'n Jaanaa'n

Ab tera zikr bhi shayed hi ghazal mein aaey
Aur se aur huey dard kay unwaa'n Jaanaa'n

Hum   kay  ruthi  hui   rutt  ko  bhi   mana  lete   thay
Hum ne dekha hi na tha mausam-e-hijraa'n Jaanaa'n

Hosh aya to sabhi khwaab thay reza reza
Jaise urte huey auraq paresha'n Jaanaa'n

                                    Ahmad Faraz