jis ki wajah sey biwiyan azdawaji zindagi mein fa'aal kirdaar ada nahin kartiin jab kay kuch adum itmenan ki wajah sey jinsi beyrahrawi ka shikar ho jati hain kyun kay unhein har baar jinsi sukoon kay husool mein naakami hoti hai. Bohut si aurtein saari zindagi jinsi lazzat sey mehroom rehti hain. Iss ki bari wajah ilm ki kami hai, kyun kay mardon ki aksaryat ko ilm hi nahin kay biwi ko kis tarah jinsi sukoon muhayya karna hai. Humarey haan urdu mein iss hawaley sey ek do meyari kutub kay elawa baqi aksaryat kharafaat sey bhari hain. Iss silsiley mein mazhabi nuqta e nigaah sey kafi achi kutub likhi gaee hain magar inn kutub mein sex ka hissa na honey kay baraber hai, jis ki wajah sey khawateen o hazraat ko azdawaji ta'alluqaat kay hawaley sey meyari maaloomaat nahin miltiin. Iss hawaley sey haal hi mein ek bohut achi kitab parhney ka moqa mila magar sex kay hawaley sey iss musannif ko bhi ilm na tha kay mubashrat kahan ki jati hai yani faraj (vagina) kahan waqa'e hai.

    20 saal sey clinic mein logon kay azdawaji masail ko hal kartey huey ek din khayal aaya kay iss hawaley sey logon ko zaroori ta'aleem dii jaey taakay woh khushgawar zindagi basar kar sakein. Chunancha humney Lahore aur Lahore sey baher  ek seminar kay zaryaey ta'aleem ka ek silsila shuru kya jis mein mukhtalif shehron sey mard hazraat shamil hotey thay. Mulk bhar mein apni nauiyat kay iss wahid seminar ney shurka'a ko azdawaji khushyan deney mein bharpoor kirdar ada kya. Shurka'a ka khayal tha kay Pakistan bhar sey log iss seminar sey mustafeed nahin ho saktey, le'haza inn ma'aloomaat ko kitab ki shakal mein paesh kya jaey. Chunancha seminar ka yeh silsila aarzi tor per rok kar iss mozou per mazeed muta'alla aur tehqeeq ki gaee. Ab yeh saari ma'aloomaat aap ki khidmat mein paesh hain.