Albatta ma'aroof aalim e deen janab Javed Ghamdi ney sab sey pehley bilmushafa mulaqaat ki da'awat dii aur ek ghantey sey za'ed guftugoo ka silsila jari raha. Iss kay elawa ahl e hadees maktaba e fikr kay risala "Al Aetisaam" ki taraf sey mufassir e Quran janab Hafiz Salahuddin Yousuf Sahab ney jawab diya. Iss tarah "Muhaddis" risala kay mudeer janab AbdurRehman Madni sahib ney mulaqaat ka moqa diya aur kaee ghantey guftugoo jari rahi. Inn ulma ka khayal tha kay seminar ka silsila chalta rehna chahiyie taa kay logon ko durust ma'aloomaat milein. Janab Ghamidi sahib ney mazeed irshad farmaya kay khawateen bhi isi tarah kay masail ka shikar hain jis ki wajah sey khandaan bikher rahey hain. Inn kay liye bhi sex education seminar ka silsila shuru kya jaey.

    Alhamra Hall ka seminar kamyaabi sey rawa'n dawa'an tha kay intezamia ko mehsoos hua kay yeh seminar fahaashi aur aur bey hayaee hai Alhamra mein iss ka iniqaad acha nahin lagta, haala'n kay wahan dramo'n ki surat mein bey hayaee ka ek sey barh kar ek program hota hai jis kay khilaf akhbaro'n mein bhi aawaz uthti rehti hai chunancha humein wahan iss free seminar ki ijazat deney sey inkaar kar diya gaya. Humney ajaeb ghar kay hall mein yeh seminar muna'aqqid karney ki koshish kii, humein bataya gaya kay woh iss tarah kay program ki iss hall mein ijazat nahin dey saktey, chunancha awami satah per yeh silsila munqata'a karna para. Ba'ad aza'n "Sunfort Hotel" Liberty Gulberg mein seminar ka yeh silsila shuru kya gaya. Wahan hum 4 seminars/workshops muna'aqqid kartey hain.

1. Naujawani Kay Masail Aur Hal
2. Shaadi Ki Bharpoor Khwahish Aur Masail