Dr. Khalil Ahmed ka bey hudd shukar guzar hun jinhon ne meri bharpoor hausla afzaee farmaee, unhon ne kitab ka ek ek lafz parha un kay mashwaron ki roshni mein muswaddey mein ka'ee tabdiliyan ki gain. Un ki dosti mere liye ek bohut bari naemat hai.

    Mein apne honahar shagird aur dost mahir-e-nafsiyat professor Dr. Syed Sabir Hussain Shah (gujrat) aur apne pyare cousin, zaheen shagird aur dost mahir-e-nafsiyat janab Zahid Hameed (islamabad) ka khaas tor per shukar guzar hun jinhon ne mujhe  kitab kay hawaley  se mufeed ma'aloomaat faraham kiin jo iss kitab ki zeenat baniin.

    Apne amreeki dost janab AbdulHaleem Khan aur bhateejay Hafiz Ishtiaque Nazeer (london) ka be hudd mamnoon hun jinhon ne masroofiyat kay iss daur mein qeemti waqt nikal kar iss mozou per taaza tareen aur meyaari kutub bhijwaiin jin se mere ilm mein bohut izaafa hua.

    Aakhir mein apne mua'awin-e-khusoosi janab Muhammad Irshad ka bhi khusoosi tor per shukar guzar hun jin ki wajah se meri zindagi bohut aaram deh hai.