Ba'az ahem cheezo'n ki wazahat kay liye tasaweer aur khaako'n ki zaroorat hai kyun kay ek tasveer hazar alfaaz se behter hoti hai magar hum ne unhein kitab mein shamil karna munasib nahin samjha taa'hum agar aapko zaroorat ho to aap barah-e-raast yeh khaakey hum se hasil kar sakti hain.
    Meri pehli kitab "Sex Education…Sab Kay Liye" parhne kay baad bohut se qara'een ney phone pey ya clinic aa kar apney tabsaro'n sey nawaza, ek tabsara bohut khaufnaak tha, woh ek sahib ney merey samney beth kar inn alfaaz mein kya kay "Jab meiney yeh kitab dekhi to pehla khayal yeh aaya kay kisi yahoodi ney humare akhlaaq sey khelne kay liye likhi hogi, jab parhi to dil sey duaa nikli aur shukriya adaa karney aaya kyun kay iss kitab ney meri soch aur zindagi ka rukh badal diya" Merey dost janab Akhtar Abbas ka khayal hai kay "iss kitab kay baad aap ko dua'ein bhi bohut mileingi aur bohut sey ghar ujarney sey buch jaein gey, bohut mumkin hai kuch sukht tabsarey aur sukht baatein bhi sunney ko milein." Mein samajhta hun yeh baat bilkul durust hai kitab parhney sey pehley ra'ey laaziman aur hogi aur parhney kay baad aur.
    Iss kitab sey bharpoor faeda uthaney kay liye pehley ek baar aap isey sarsari sa parh lein, phir dobara parhein aur apney pasandeeda mozoua'at per nishan laga lein. Teesri baar sirf unhi ko parhein aur un sey faeda uthaein, Kitab kay hawaley sey apni ra'ey zaroor dein taa kay aap kay mashwaro'n ki roshni mein isey mazeed behter banaya ja sakey. Khat likhiyie, paeghaam bhejiyie ya phone kijiyie mujhey khushi hogi.

Arshad Javed 773 – Shadmaan – 1 – Lahore
Phone: 042 – 7676430
Mobile: 0300 - 9484655