Jinsi Sukoon Kay Mutabadil Tariqey

(Alternate Methods Of Sexual Satisfaction)

 Yeh hissa buniyadi tor per hamari doosri book " Azdawaji khushiyan_____khawateen kay liye" ka hissa tha magar Pakistani society ki jinsi hasasiyat ki wajah sey isey wahan sey nikal kar iss book mein shamil kardiya gaya. Biwi kay liye iss ka parhna khushgawar azdawaji zindagi kay liye nehayat zaroori hai takay woh apney mian ko bharpoor jinsi taskeen mohayya kar sakay.

Jinsi Sukoon Kay Mutabadil Tariqey

(Sexual Satisfaction Alternatives) 

    Baaz khawateen ki jinsi khwahish mardon sey ziyada hoti hai. Iss tarhan baaz mardon ki jinsi khwahish aurton sey ziyada hoti hai. Tahem majmoi tor per mardon ki jinsi khwahish aurton sey kuch ziyada hoti hai. Mardon ki jinsi khwahish shadeed jab kay aurton ki kam shadeed hoti hai jis ki wajah sey mardon ko apni jinsi khuwahish ko control karna nisbaatan mushkil hota hai jabkay aurtein amooman apni khuwahish ko aasani sey control kar leyti hain. Mazeed yeh kay mard foran jinsi tor per mushta'el hojata hai jabkay aurat ko jinsi stimulation aur orgasm kay hasool kay liye mard sey 10 gunaa ziyada waqt ki zaroorat hai. Humarey yahan khawateen amooman gharon mein rehti hain jab kay mard bahir nikalta hai. Mard chunkay fitri tor per bazariya basarat jinsi tor per mushta'el hota hai woh jab kisi khoobsorat aurat ko dekhta hai to foran jinsi tor per mushta'el hojata hai aur phir jinsi sukoon chata hai. Aisi surat mein Allah Ta'ala kay piyarey Nabi Hazrat Muhammad (P.B.U.H) ka irshad hai ka mard ghar jaey aur biwi sey mubaashirat karey.